ԵՐԵՎԱՆ, ՀՈՒԼԻՍԻ 1, 24News

1939 թվականի Մոսկվայում կայացած Համամիութենական գյուղատնտեսական ցուցահանդեսի ամենաճանաչելի ազգային տաղավարներից մեկը Հայկական ԽՍՀ տաղավարն էր՝ կառուցված ճարտարապետներ Կ.Ս.Ալաբյանի և Ս.Ա.Սաֆարյանի նախագծով։ Այդ մասին հիշատակել է ՀՀ-ում ՌԴ դեսպանությունը․

«Շենքը կառուցվել է 11-13-րդ դարերի միջնադարյան հայկական տաճարներին բնորոշ ազգային ճարտարապետության ավանդույթներով։ Հատակագծի հիմքը հանդիսացել է եռանավ բազիլիկ հորինվածքը, որի կենտրոնական մասը ծածկված էր երկթեք տանիքով։ Կողմնային ճակատները զարդարված էին բաց կամարաշարքներով՝ շրջանակված կրկնակի կիսաշարասյուններով:

Տաղավարի գլխավոր մուտքը իրենից ներկայացնում էր եռամաս կամար, որը զարդարված էր ալյումինե ձուլվածքից զարդավոր ցանցով՝ խաղողի ողկույզների և այլ պտուղների պատկերներով, որոնք Հայաստանի խորհրդանիշներն են։ Ներքին հարդարանքում հարուստ զարդարված կամարները տարածքը բաժանում էին դահլիճների: Պատերը զարդարված էին Արարատյան դաշտի տեսարաններով և տարբեր գյուղատնտեսական տեսարանների պաննոներով:

1955 թվականին տաղավարը երեսպատվել է կարմիր տուֆով, իսկ 1960 թվականին՝ վերակառուցվել է։ 2003 թվականից ի վեր Հայաստանի ազգային բազմազանությունը ներկայացված է այլ շենքում՝ թիվ 68 «Հայաստան» տաղավարում, որը կառուցվել է ՎԴՆԽ-ում 1954 թվականին՝ ճարտարապետներ Ռ.Ռ.Կլիքսի և Վ.Մ.Տաուշկանովի նախագծով»։