Քաղաքացին ձերբակալվել է՝ դիտավորությամբ ուրիշի առողջությանը ծանր վնաս պատճառելու կասկածով

ԵՐԵՎԱՆ, ՄԱՅԻՍԻ 6, 24News

քկ

2020թ-ի մայիսի 4-ին` ժամը 23:25-ին, «Գորիսի բժշկական կենտրոն» ՓԲ ընկերությունից ահազանգ է ստացվել այն մասին, որ իրենց մոտ է տեղափոխվել Գորիս քաղաքի 45–ամյա բնակիչը` աջ ազդրի ստորին երրորդականի կույր հրազենային վնասվածք, ազդոսկրի միջին ստորին երրորդականի շրջանի փակ բազմաբեկորային կոտրվածք` օտար մարմնի առկայություն ախտորոշմամբ: Այս մասին հայտնում են ՔԿ տեղեկատվության և հասարակայնության հետ կապերի վարչությունից։

Դեպքի առթիվ ՀՀ քննչական կոմիտեի Սյունիքի մարզային քննչական վարչության Գորիսի քննչական բաժնում հարուցվել է քրեական գործ` ՀՀ քրեական օրենսգրքի 112-րդ հոդվածի (դիտավորությամբ առողջությանը ծանր վնաս պատճառելը) 1-ին մասով և 235-րդ հոդվածի (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 1-ին մասով:

Պարզվել է, որ ենթադրյալ հանցագործությունը կատարած անձը  Գորիս-Ստեփանակերտ ավտոճանապարհի ձախակողմյան հատվածում գործող հացատանը, անձնական հարցերի պարզաբանման ժամանակ, իր մոտ ապօրինի պահվող «Մակարով» տեսակի 9 մմ տրամաչափի ատրճանակով կրակոց է արձակել 45-ամյա համաքաղաքացու ուղղությամբ՝ առողջությանը պատճառելով ծանր վնաս և հեռացել դեպքի վայրից:

Ձեռնարկված քննչական գործողությունների և օպերատիվ-հետախուզական միջոցառումների արդյունքում պարզվել է ենթադրյալ հանցագործություն կատարած անձի ինքնությունը, որը Գորիս քաղաքի 44-ամյա բնակիչ է: Վերջինս ձերբակալվել է:

Դեպքի  վայրի զննությամբ հայտնաբերվել է «Մակարով» տեսակի 9 մմ տրամաչափի ատրճանակ և առգրավվել:  

Նախաքննությունը շարունակվում է: