Քրեակատարողական ծառայության տեղաբաշխման հանձնաժողովն նիստ է անցկացրել «Արմավիր» ՔԿՀ-ում

ԵՐԵՎԱՆ, ՓԵՏՐՎԱՐԻ 10, 24News

.

Հայաստանի Հանրապետության արդարադատության նախարարության քրեակատարողական ծառայության կենտրոնական մարմնում գործող տեղաբաշխման հանձնաժողովը՝ հանձնաժողովի նախագահ, քրեակատարողական ծառայության պետի առաջին տեղակալ, արդարադատության գեներալ-մայոր Արտակ Հարությունյանի գլխավորությամբ, փետրվարի 10-ին արտագնա նիստ է անցկացրել Հայաստանի Հանրապետության արդարադատության նախարարության «Արմավիր» քրեակատարողական հիմնարկում:

Ինչպես տեղեկացրին ՀՀ ԱՆ քրեակատարողական ծառայության հանրային կապերի բաժնից, նիստի ընթացքում հանձնաժողովի անդամները բազմակողմանի ուսումնասիրել և գնահատել են Հայաստանի Հանրապետության արդարադատության նախարարության «Արմավիր» քրեակատարողական հիմնարկի դատապարտյալների դրսևորած վարքագծի վերաբերյալ բնութագրերն ու մյուս անհրաժեշտ փաստաթղթերը, ինչպես նաև անձնապես հանդիպել համապատասխան դատապարտյալների հետ՝ օրենքով սահմանված կարգով ուղղիչ հիմնարկի տեսակն ըստ մեկուսացվածության աստիճանի փոխելու որոշում կայացնելու համար:

Հանձնաժողովի նույն գործունեության շրջանակներում կազմակերպվել է ուղղիչ հիմնարկի տեսակը դեպի մեկուսացվածության առավել ցածր աստիճանի փոխելու խնդրանքով դիմած, «Արմավիր» քրեակատարողական հիմնարկում պատիժ կրող  ցմահ ազատազրկման դատապարտվածների անհատական ընդունելություն, որի ընթացքում հանձնաժողովի անդամներն անմիջական պատկերացումներ են կազմել նշված անձանց անհատական հատկանիշների, բարոյահոգեբանական բնութագրերի, նրանց կողմից ներկայացված պատճառաբանությունների և դրանց հիմնավորումների, ինչպես նաև նրանց վարքագծի ու հնարավոր ռիսկերի վերաբերյալ:

Հանձնաժողովի աշխատանքներն ավարտելուց հետո քրեակատարողական ծառայության պետի առաջին տեղակալ Արտակ Հարությունյանը շրջայց է կատարել հիմնարկի տարածքում, ծանոթացել շենքային, ինչպես նաև անազատության մեջ գտնվող անձանց պահման և նրանց կողմից պատժի կրման կարգին ու պայմաններին, վերջիններիս հետ կապված խնդիրներին:

Աշխատանքային այցի վերջում արդարադատության գեներալ-մայոր Արտակ Հարությունյանի կողմից հիմնարկի համապատասխան կառուցվածքային ստորաբաժանումների հետ անցկացվել են մասնագիտական քննարկումներ, որոնց ընթացքում, ի թիվս այլ հարցերի, անդրադարձ է կատարվել օրինականության ապահովմանը, հնարավոր կոռուպցիոն ռիսկերի ու դրսևորումների բացառմանը, մասնագիտական գիտելիքների և ծառայողական հմտությունների ու կարողությունների կատարելագործմանն ու դրանցից բխող գործելակերպի նոր ձևաչափերին, տրվել են նաև անհրաժեշտ պարզաբանումներ ու ցուցումներ: