Մարդ, որ շահեկանորեն տեղավորվել է՝ անկախ գաղափարներից․ Ռուբինյանը՝ Մարուքյանի մասին

ԵՐԵՎԱՆ, ՀՈՒՆՎԱՐԻ 24, 24News

1

Կոնֆորմիզմի մասին խոսում է մարդ, որը Հայաստանի վերջին տարիների ոչ մի քաղաքական իրադարձության ընթացքում կտրուկ եւ հստակ դիրքավորում չի ընտրել։ «Լուսավոր Հայաստան» խմբակցության ղեկավար Էդմոն Մարուքյանի մասին ֆեյսբուքյան իր էջում նման գրառում է արել «Իմ քայլը» խմբակցության պատգամավոր Ռուբեն Ռուբինյանը։

 «Էդմոն Մարուքյանը, պատասխանելով Լենա Նազարյանի քննադատական ելույթին, կասկածի տակ է դրել, որ ելույթի հեղինակը տիկին Նազարյանն է, ապա «Իմ քայլին» մեղադրել է կոնֆորմիզմի (որը, ի գիտություն Մարուքյանի, գրվում է ն-ով, այլ ոչ մ-ով) մեջ եւ պնդել, որ մենք մոլորվել ենք հին ու նոր Հայաստանի միջանցքներում եւ չենք կողմնորոշվում, թե որ ուղղությամբ շարժվել:

Մարուքյանին, որը նախկինում հանրության լայն շրջանակների կողմից հաճախ կասկածվել է այլ ուժերի խոսափող լինելու մեջ (ինչին երբեք չեմ ուզեցել հավատալ եւ հուսով եմ, որ այդպես կշարունակվի), ուզում եմ տեղեկացնել, որ մենք մշտապես խոսել եւ խոսում ենք բացառապես մեր անունից եւ մեր տեքստերով՝ պարզ եւ ուղիղ:

Կոնֆորմիզմի մասին խոսում է մարդ, որը Հայաստանի վերջին տարիների ոչ մի քաղաքական իրադարձության ընթացքում կտրուկ եւ հստակ դիրքավորում չի ընտրել, որը մշտապես փորձել է ինչ-որ կերպ շահեկանորեն տեղավորվել քաղաքական վերադասավորումների համատեքստում՝ անկախ գաղափարներից եւ արժեքներից:

Չկողմնորոշվելու մասին խոսում է մարդ, որը պարզ եւ վճռորոշ իրավիճակներում, երբ պիտի ընտրես x-ը կամ կամ y-ը, միշտ ընտրել է երրորդ ճանապարհը:

Հուսով եմ՝ Մարուքյանին մի օր կհաջողվի հաղթահարել իր ինքնության ճգնաժամը եւ, ի վերջո, դառնալ բովանդակային ընդդիմություն, իսկ մենք մեր ընտրությունը կայացրել ենք վաղուց, եւ այն հստակ է՝ շարունակելու ենք Հայաստանում լայնածավալ բարեփոխումների գործընթացը», - գրել է նա։