ԵՐԵՎԱՆ, ՄԱՅԻՍԻ 1, 24News
Ղրղզստանում «Անմահ գնդի» այս տարվա երթը չեղարկվել է անվտանգության նկատառումներով։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտնել է հանրապետության ՆԳՆ մամուլի ծառայությունը։
«Հասարակական կարգն ու անվտանգությունն ապահովելու նպատակով ՆԳՆ-ն ձեռնարկում է մի շարք միջոցառումներ՝ ուղղված հասարակական անվտանգությանը սպառնացող վտանգների կանխարգելմանը և վերացմանը։ Այդ նպատակով որոշվել է չեղարկել «Անմահ գնդի» երթը Ղրղզստանում»,- ասված է հաղորդագրության մեջ։
Նախարարությունը քաղաքացիներին կոչ է արել ըմբռնումով մոտենալ ձեռնարկվող անվտանգության միջոցառումներին։
Անցյալ տարի Բիշքեկում և Ղրղզստանի այլ քաղաքներում «Անմահ գնդի» Հաղթանակի օրվա ավանդական երթին մասնակցել են տասնյակ հազարավոր մարդիկ։ Այս տարի նույնպես նախատեսված էր անցկացնել այդ միջոցառումը։
Ղրղզստանի ավելի քան 360 հազար քաղաքացի մասնակցել է Հայրենական մեծ պատերազմին, մեկ երրորդը չի վերադարձել տուն, 72 հոգի արժանացել է Խորհրդային Միության հերոսի կոչման, ոմանք՝ երկու անգամ: Հանրապետությունում Հաղթանակի օրը պետական տոն է։
--00—ԼՀ