ԵՐԵՎԱՆ, ՓԵՏՐՎԱՐԻ 28, 24News
Փետրվարի 28-ին ժամը 14:18-ին, Ստեփանակերտ քաղաքի բնակչից ահազանգ է ստացվել, որ մայրաքաղաքի Բարեպաշտ փողոցում հրդեհ է բռնկվել: Նախնական տվյալներով այրվում է չոր խոտատարածք: Այս մասին տեղեկանում ենք Արցախի ԱԻՊԾ-ից։
Անմիջապես դեպքի վայր է մեկնել հրշեջ փրկարարական մեկ մարտական հաշվարկ և իրականացրել հրդեհաշիջման և կանխարգելիչ միջոցառումներ։
Պարզվել է, որ չոր խոտատարածքում բռնկված կրակը տարածվել և հասել է մոտակայքում գտնվող անասնագոմին կից ծածկոցին:
Հաշվի առնելով հրդեհի չափն ու սպասվող վտանգը, ժամը 14:38-ին փրկարար ուժերի վարչության հրշեջ փրկարար մասից ևս մեկ հաշվարկ ուղարկվել է դեպքի վայր:
Հրշեջ փրկարարները հրդեհը մեկուսացրել են ժամը 15:00-ին, մարել`ժամը 15:43-ին:
Այրվել է մայրաքաղաքի բնակչին պատկանող, անասնագոմին կից 5X10 մ չափերի ծածկոցը լրիվությամբ, 50X100 մ չոր խոտատարածք և թփեր:
Դեպքի առթիվ ստուգումներ է իրականացնում ծառայության պետական հրդեհային և տեխնիկական անվտանգության տեսչությունը:
ԱԻ ծառայությունը զգուշացնում է, որ ջերմաստիճանի բարձրացման պատճառով մեծանում է հրդեհների առաջացման վտանգը։ Ուստի անհրաժեշտ է խստագույնս պահպանել հրդեհային անվտանգության կանոնները։
--00—ՅՄ