««Թաթոյան» հիմնադրամը չունի որևէ օլիգարխից ֆինանսավորում». նախկին ՄԻՊ-ը Լոս Անջելեսում է

ԵՐԵՎԱՆ, ՀՈԿՏԵՄԲԵՐԻ 3, 24News

նկար

ՀՀ նախկին ՄԻՊ Արման Թաթոյանը գրառում է արել.

«ԱՄՆ-ի Լոս Անջելես քաղաքում կազմակերպվեց հատուկ միջոցառում` հայ համայնքի մի շարք կառույցներին ու անհատներին Իրավունքի և արդարության կենտրոն «Թաթոյան» նորաստեղծ հիմնադրամի գործունեությունը ներկայացնելու համար։

Հանդիպման սկզբում նշեցի, որ մեր հիմնական գործառույթներից է ադրբեջանական հանցանքների ապացույցներ ամրագրելը, հետազոտելը, մեղավորներին քրեական պատասխանատվության ենթարկելուն նպաստելը:

Դրանից բացի՝ հիմնադրամի գործունեության ուղղություններն են լինելու.

• Հայաստանում ժողովրդավարության և իրավունքի գերակայության ամրապնդումը,

• մարդու իրավունքների և սոցիալական արդարության, ազգային անվտանգության ապահովումը,

• գիտակրթական և հետազոտական գործունեությունը, հանրային իրազեկումների միջոցով հասարակությունում գիտելիքների մակարդակի բարձրացումը,

• հասարակությունում փոխադարձ հարգանքի, բազմակարծության և հանրային համերաշխության ապահովումը,

• Հայաստանի, Արցախի և Հայկական սփյուռքի միջև կապերի, համահայկական համերաշխության ապահովումը և ազգային արժեքների պաշտպանությունը:

Գործարկման փուլում է www.tatoyanfoundation.org կայքը, որի միջոցով հնարավոր է նվիրատվություններով աջակցել հիմնադրամի ծրագրերի իրականացմանը։

Ընդգծեցի ևս մեկ անգամ, որ հիմնադրամի հետ կապված` իրականացնելու եմ ակտիվ հանրային գործունեություն։ Հիմնադրամը չունի որևէ օլիգարխից ֆինանսավորում․ ֆինանսական աջակիցներն են մեր անհատ հայրենակիցները:

Ներկայացրի, որ հիմնադրամում աշխատակիցները Մարդու իրավունքների պաշտպանի աշխատակազմի նախկին աշխատակիցներն են․ պրոֆեսիոնալներ են և ունեն ճգնաժամային իրավիճակներում աշխատելու մեծ փորձառություն։

Հանդիպմանը մասնակցել են Լոս Անջելեսի, Չիկագոյի և մի շարք այլ քաղաքների հայկական կառույցների ղեկավարներ ու անհատներ` հայտնի փաստաբաններ, լրագրողներ, պատմաբաններ, արվեստագետներ և այլն:

Հ․Գ․ ԱՄՆ-ում եմ գտնվում գործնական այցով, որի շրջանակներում տեղի են ունեցել բարձրաստիճան հանդիպումներ, քննարկվել են նոր ծրագրեր ու նախաձեռնություններ»:

--00—ԼՄ