Քիչ հավանականություն կա, որ ողջ մարդ դուրս կգա նման ծավալի փլատակների տակից. ԱԻՆ փոխնախարար

ԵՐԵՎԱՆ, ՕԳՈՍՏՈՍԻ 15, 24News

Փլուզումներն ահռելի ծավալի են, երկաթբետոնե կոնստրուկցիաներ են, գրեթե ողջ տարածքը փլատակների տակ է, 24 ժամյա ռեժիմով շարունակելու ենք իրականացնել որոնողափրկարարական աշխատանքները: Այս մասին 24TV-ի հաղորդման ժամանակ նշեց Արտակարգ իրավիճակների նախարարի առաջին տեղակալ Արտյուշ Գրիգորյանը:

Անդրադառնալով անհետ կորած հարազատների այն դժգոհություններին, որ գիշերը տեխնիկայի և փրկարարների պակաս է եղել, ԱԻՆ փոխնախարարը նշեց, որ գիշերը աշխատանքները չեն դադարել, սակայն հերթափոխի և մարդկանց հոգնածության պատճառով աշխատանքների ինտենսիվությունը ցերեկվա համեմատ թուլացել է. «Գործընկեր պետական կառույցներից՝ Երևանի քաղաքապետարանից և տարածքային ինքնակառավարման մարմիններից ներգրավել ենք ջրատար մեքենաներ, ծանր տեխնիկա, ամբարձիչներ, կռունկներ, բեռնատար տրանսպորտային միջոցներ, բայց պնդում եմ, աշխատանքները երբեք չեն դադարել»: 

Հարցին, թե որքանո՞վ է հավանականությունը, որ այդքան ժամ անց փլատակների տակից ողջ մնացած քաղաքացիներ կհայտնաբերվեն, Արտյուշ Գրիգորյանը պատասխանեց. «Բացի փլատակների կույտից, նաև շատ բարձր աստիճանի ջերմություն է եղել, ցավոք, հավանականությունը փոքր է, որ նման ծավալի փլատակների տակից կարող ենք ողջ քաղաքացիներ հայտնաբերել: Հրդեհաշիջման աշխատանքների սկզբում 10 քաղաքացու հաջողվել է փրկել, ոչ մեկի կյանքին վտանգ չի սպառնում»:

Մանրամասները՝ տեսանյութում։

Տեսանյութեր