ԵՐԵՎԱՆ, ՀՈՒՆԻՍԻ 21, 24News
Չի կարող այս նախագիծը քվեարկվել, Իրավաբանական վարչությունը նույնիսկ չի նայել, որը պարտավոր էր անել, որովհետև կանոնադրությունների իրավական կողմն էլ պետք է նայեն։ Այս մասին Երևանի ավագանու նիստին ասաց ավագանու «Լույս» խմբակցության անդամ Անի Խաչատրյանը՝ անդրադառնալով Երևանի մի շարք համայնքային ոչ առևտրային կազմակերպություններ վերակազմակերպելու, անվանափոխելու, կանոնադրությունները նոր խմբագրությամբ հաստատելու մասին նախագծին:
«Փաստացի, ի սկզբանե, երբ այս նախագիծը եկավ, Դուք, պարոն քաղաքապետ, շպրտեցիք, բարձր տոնից ասացիք՝ այստեղ չկա հիմնավորում։ Մի հատ համեմատեք, տեսեք՝ ինչ է փոխվել։ Մի քանի ուրիշն էլ ավելացել է, դարձել է փաթեթ, չի փոխվել, ուղղակի փաթեթ է դարձել»,-ասաց ավագանու անդամը։
Նրա ձևակերպմամբ՝ եթե այդ նախագծին քվեարկեն, այդ նախագիծը գրողն է կրում պատասխանատվություն՝ իրավական առումով։
«Ես վստահ ասում եմ, որ դիմելու եմ դատարան այս որոշումը չեղարկելու համար»,-նշեց Անի Խաչատրյանը։
Այնուհետև, անդրադառնալով նախագծի հեղինակ Արման Անտոնյանի ելույթին, Խաչատրյանն ասաց․
«Պարոն Անտոնյան, եթե ես ձեր մահափորձում ներգրավված լինեի, չէի վրիպի, և Դուք այս դահլիճում չէիք լինի»։
Իրավիճակը դահլիճում լարվեց, լսվեցին գոռգոռոցներ․
«Չի կարելի»,-փորձեց իրավիճակը վերահսկել քաղաքապետը։
«Ես եմ որոշում իմ կարելիները»,-արձագանքեց ավագանու անդամը։
Բարձրախոսն անջատեցին, հետո ընդմիջեցին։
Մանրամասները՝ տեսանյութում։
--00—ՀԶ