Մի խումբ անձինք հանձնել են զենք-զինամթերք․ դրանք հիմնականում բերված են եղել Արցախից

ԵՐԵՎԱՆ, ԱՊՐԻԼԻ 11, 24News

Բնակչության մոտ ապօրինի պահվող զենք-զինամթերքի հայտնաբերման ու կամավոր հանձնման ուղղությամբ ոստիկանության տարածքային ստորաբաժանումների ծառայողների ամենօրյա միջոցառումները շարունակվում են։ Այս մասին հայտնումեն Ոստիկանությունից։

Արդյունավետ բացատրական աշխատանք են իրականացրել ոստիկանության Սյունիքի մարզային վարչության շտաբի, Գորիսի համայնքային ոստիկանների և Սիսիանի բաժնի ծառայողները, ինչի շնորհիվ արձանագրվել են «Կալաշնիկովի» ինքնաձիգների և ռազմամթերքի, այդ թվում՝ պայթուցիչով նռնակի և մի քանի հարյուր փամփուշտի կամավոր հանձնման դեպքեր։

«Կալաշնիկովի» ինքնաձիգների և ռազմամթերքի կամավոր հանձնման առումով արդյունավետ բացատրական աշխատանք են իրականացրել նաև ոստիկանության Արարատի մարզային վարչության շտաբի, Արտաշատի բաժնի և Արարատի բաժանմունքի ծառայողները։ Այս դեպքերում ևս ինքնաձիգներն ու ռազմամթերքը բերվել էին Արցախից։

Հատկապես արդյունավետ էր Արարատի մարզային վարչության մեկ այլ ստորաբաժանման՝ Մասիսի բաժնի ծառայողների բացատրական աշխատանքը, ինչի շնորհիվ արձանագրվել են Արցախից բերված «Կալաշնիկովի» ինքնաձիգների, հրացանի և ռազմամթերքի, այդ թվում՝ հակատանկային նռնականետի արկի կամավոր հանձնման դեպքեր։

Ապօրինի պահվող զենք-զինամթերքի կամավոր հանձնման դեպքեր են արձանագրվել նաև ոստիկանության Լոռու մարզային վարչության Տարոնի և Տաշիրի բաժիններում։ Նշանակվել են փորձաքննություններ։ Հորդորում ենք ապօրինի զենք-զինամթերքը կամավոր հանձնել ոստիկանություն՝ քրեական պատասխանատվությունից խուսափելու համար։

--00--ՀԶ