Սարգսյանի հրաժարականը կարող է պայմանավորված լինել Բաքվի և Անկարայի հետ սկսված գործընթացներով 

ԵՐԵՎԱՆ, ՀՈՒՆՎԱՐԻ 23, 24News

նկար

Նախագահ Արմեն Սարգսյանի հրաժարականը կարող է կապված լինել այն գործընթացների հետ, որոնք պաշտոնական Երևանը սկսել է Թուրքիայի և Ադրբեջանի հետ։ Այս մասին ռուսաստանյան ՏԱՍՍ գործակալությանն ասել է քաղաքագետ, «Ոսկանապատ» վերլուծական կենտրոնի ղեկավար Հրանտ Մելիք-Շահնազարյանը։ 

«Արմեն Սարգսյանի հրաժարականն անակնկալ էր ոչ միայն Հայաստանի հասարակության, այլև քաղաքական գործընթացների մասնակիցների մեծ մասի համար։ Ամենայն հավանականությամբ, Սարգսյանի հրաժարականը կապված է հայ-ադրբեջանական և հայ-թուրքական հարաբերություններում նախանշվող զարգացումների հետ», - ասել է նա։ 

Քաղաքագետի գնահատմամբ, Հայաստանի քաղաքական շրջանակներում ավելի են ակտիվանում խոսակցությունները, որ Նիկոլ Փաշինյանի կառավարությունը պատրաստվում է ստորագրել Ադրբեջանի և Թուրքիայի հետ հարաբերությունների վերականգման համաձայնագրեր։ «Շատերը հենց Սարգսյանի անակնկալ հրաժարականը կապում են այս ոչ պոպուլյար պայմանագրերի համար պատասխանատվություն վերցնելու ցանկության բացակայության հետ», - ասել է նա։

Նախագահ Արմեն Սարգսյանը, որն այս օրերին Լոնդոնում է, կիրակի՝ ուշ երեկոյան, հայտարարել էր հրաժարականի մասին։ Ըստ Սահմանադրության՝ նրա հրաժարականը համարվում է ընդունված, երբ ԱԺ-ն օրենքով սահմանված կարգով հայտարարում է այդ մասին։ Սարգսյանի հրաժարականից հետո երկրի նախագահի գործառույթները կիրականացնի ԱԺ խոսնակը, իսկ նոր նախագահ խորհրդարանը կընտրի պաշտոնական հրաժարականից ոչ շուտ քան 25 և ոչ ուշ քան 35 օր հետո։ Հանրապետության նախագահն ընտրվում է 7 տարի պաշտոնավարման ժամկետով։

--00—ԼՄ