ԵՐԵՎԱՆ, ՕԳՈՍՏՈՍԻ 19, 24News
Թուրքիայի ռազմաօդային ուժերի անօդաչու թռչող ապարատը հարվածել է քրդական կազմավորումների շտաբին Հասեքե քաղաքի՝ Սիրիայի հյուսիս – արևելքում համանուն նահանգի վարչական կենտրոնի մոտակայքում: ՏԱՍՍ-ի հաղորդմամբ՝ օգոստոսի 20-ին այդ մասին հայտնել է Դուբայից հեռարձակվող Al Hadath հեռուստաալիքը: Հեռուստաալիքի տեղեկատվությամբ՝գրոհի հետևանքով զոհվել է «Ժողովրդավարական Սիրիայի ուժերի» (ԺՍՈՒ) ինը մարտիկ, առնվազն տասը վիրավորվել է:
Թուրքիան 2019 թվականի հոկտեմբերին Սիրիայի հյուսիս – արևելքում իրականացրել է «Խաղաղության աղբյուր» ռազմական գործողությունն՝ ստեղծելով 30-կիլոմետրանոց անվանգության գոտի իր սահմանի երկայնքով:
Օգոստոսի 17-ին թուրքական բանակի հրետանին գնդակոծել է Աբու Ռայսեն քաղաքի շրջակայքը՝ Հասեքեի նահանգի հյուսիսում: Թուրք զինվորականներն ավելի քան 50 արկ են արձակել Սիրիայի տարածք: Դարդարա գյուղում հրետակոծության տակ են հայտնվել խաղաղ բնակիչների տները, ինչի հետևանքով զոհվել է մի կին, մի քանի մարդ վիրավորվել է։
--00—ՄՀ