ՀՀ-ում չձևավորվեց վճռական գործիչների համախմբում, որը կարող էր հեռացնել ապիկար իշխանությանը

ԵՐԵՎԱՆ, ՕԳՈՍՏՈՍԻ 9, 24News

Իշխանյան

Եկեք խոստովանենք, որ խայտառակ պարտությունից հետո, Հայաստանում չձևավորվեց Արցախի կորստով իրոք հուզված, վճռական գործիչների համախմբում, որը, վստահ եմ, կարող էր հեռացնել ապիկար իշխանությանը: Այս մասին ֆեյսբուքյան իր էջում գրել է իրավապաշտպան Ավետիք Իշխանյանը:

«Սկզբունքորեն չեմ հետևում «նորընտիր» ԱԺ նիստերին, սակայն լրատվամիջոցներից տեղեկանում եմ իշխող աղանդի պատգամավորների մտքի գոհարներին։

Այսօր նրանք հերթական անգամ չքմեղացել են, թե Արցախի անկումը ոչ թե իրենց, այլ «նախկինների» մեղքն է, որ Հայաստանը կապիտուլյացիայի չի ենթարկվել, որ նախկինում զինվորները սոված են եղել և այլ տխմարաբանություններ։

Այն, որ այդ մարդիկ որևէ սկզբունք, արժեհամակարգ, հայրենիքի զգացողություն չունեն պարզ է։

Բայց այսօր արդեն նրանք լիիրավ իրավունք են վաստակել` լինելու ավելի ինքնավստահ և ցինիկ։ Խայտառակ պարտությունից, ողջ Հայաստանն ու հայ ժողովրդին նվաստացնելուց հետո, նրանք կարողացան իրենց օրակարգը թելադրել բոլորին՝ ընդդիմությանը, հասարակությանը, ժողովրդին և «հաղթեցին» ընտրություններ կոչված ֆարսով։

Այո՛, մի փնովեք նրանց և մի փնտրեք մեղավորներ՝ ԿԸՀ, ՍԴ, Ոստիկանություն, Դատախազություն, ԱԱծ, ՀՔԾ, ՔԿ, դատարաններ։ Եկեք խոստովանենք, որ խայտառակ պարտությունից հետո, Հայաստանում չձևավորվեց Արցախի կորստով իրոք հուզված, վճռական գործիչների համախմբում, ովքեր վստահ եմ, կարող էին հեռացնել ապիկար իշխանությանը։ Այնպես որ, պարոնայք ընդդիմադիրներ հասնում է։ Հասնում է բոլորիս․․․»,- գրել է Իշխանյանը:

--00--ԱՀ