ԵՐԵՎԱՆ, ՀՈՒՆԻՍԻ 22, 24News
Շաբաթվա ընթացքում շարունակել են գյուղատնտեսական աշխատանքները, եղանակային պայմանները նպաստավոր են եղել այն իրականացնելու համար։ Այս մասին տեղեկացնում են Հիդրոօդերևութաբանության և մոնիթորինգի կենտրոնից։
Հովտային շրջաններում կատարվել են պտղատուների, աշնանացան ցորենի, բանջարանոցային մշակաբույսերի, խաղողի այգիների, առվույտի և ծխախոտի դաշտերի հերթական սնուցող ոռոգումներ, կորիզավորների բերքահավաք, շարունակվել է խաղողի վազի ծաղկումը:
Արարատում, Եղվարդում աշնանացան ցորենը գտնվել է կաթնային, Մերձավանում՝ մոմային հասունացման փուլերում, լեռնային շրջաններում աշնանացանը հասկակալել է, Գյումրիում՝ ծաղկել։
Գյումրիում, Մարտունիում, Մասրիկում գարնանացան գարին ցողունակալել է, Ապարանում, Շորժայում առաջացել են հանգուցային արմատները։
Գորիսում և Օձունում առաջացել է եգիպտացորենի երրորդից – յոթերորդ տերևը։
Դիտված բարձր ջերմաստիճանների և տեղումների անբավարարության հետևանքով հանրապետությունում մշակաբույսերի աճի և զարգացման համար ստեղծվել է անբարենպաստ պայմաններ, բույսերը լրացուցիչ ոռոգման կարիք ունեն։
--00--ԱԹ