Փոթորիկը Խաչփառ գյուղում տան տանիքներ է պոկել ու շպրտել, կոտրել էլեկտրասյուներ և ծառեր

ԵՐԵՎԱՆ, ՄԱՅԻՍԻ 22, 24News

․

Այսօր՝ մայիսի 22-ին, արտակարգ իրավիճակ է ստեղծվել Արարատի մարզում: Ժամը 14:00-ից 14:30-ն ընկած ժամանակահատվածում, Խաչփառ գյուղում փոթորիկը տան տանիքներ է պոկել և շպրտել, տապալել էլեկտրասյուներ ու կոտրել հսկայական ծառեր:
 
Ինչպես հայտնում է Shamshyan.com-ը, այս պահին գյուղապետ Շահեն Մարտիրոսյանը տուն առ տուն արձանագրում է վնասները, իր մոտ նշում տուժած գյուղացիների տվյալները, որոնք ուղարկելու է Արարատի մարզպետարան:

Էլեկտրասյուների տապալման պատճառով գյուղը հոսանքազրկվել է:

Օպերատվորեն գյուղ են ժամանել «Հայաստանի էլեկտրական ցանցեր» ընկերության «Արաքս» մասնաճյուղի ներկայացուցիչները, ովքեր մի քանի բրիգադներով արդեն սկսել են աշխատանքներ՝ տապալված սյուները նորերով փոխարինելու համար, որպեսզի ժամերի ընթացքում վերականգնվի էլեկտրամատակարարումը:
 
Փոթորիկը նաև գյուղի գերեզմաններում է ավիրածություններ արել՝ կոտրելով հանգուցյալների համար նախատեսված զրուցարանները:

--00--ԱՀ