Ադրբեջանցի զինվորականների թիվը Սյունիքում 1000-ից ավելի է. Վահե Հակոբյան

ԵՐԵՎԱՆ, ՄԱՅԻՍԻ 22, 24News

Վահե Հակոբյան

Սյունիքում իրավիճակը նույնն է, ադրբեջանցի զինվորականները ո՛չ առաջխաղացում են ունեցել, ո՛չ էլ հետ են նահանջել: Նույն դիրքերում և՛ մենք և՛ իրենք կանգնած ենք: «Փաստինֆո»-ի հետ զրույցում ասել է Սյունիքի նախկին մարզպետ Վահե Հակոբյանը.

«Ձեռնամարտից հետո բան չի փոխվել. ադրբեջանցիները, օգտվելով առիթից, որ մերոնք քիչ էին, հարձակվել են, բայց հետո լավ ծեծ են կերել: Մեր  ՄՈԲ-ի ժողովուրդը՝ քաղաքապետի և առաջին կորպուսի ղեկավարությամբ, հասել են ու ադրբեջանցիներին շան սատակ արել: Իմ տեղեկություններով՝ հիմա նույն տեղերում, նույն դիրքերում և՛ մենք և՛ իրենք կանգնած ենք, իրենք մեր հողի վրա դիրքավորված են»,- ասել է Սյունիքի նախկին մարզպետը:

Սակայն այս օրերին ավելացել է ադրբեջանցի զինվորականների թիվը:

«Մոտավորապես 1000-ից ավել իրենք են, ենթադրում եմ, այդքան կամ մի քիչ ավել մենք ենք»,-ասել է Վահե Հակոբյանը և ընդգծել՝ իշխանությունը կորցնում է ընդհանուր վերահսկողությունը:

Ադրբեջանի նախագահը հայտարարել էր՝ Ադրբեջանը պատրաստ է աշխատել Հայաստանի հետ խաղաղության պայմանագրի շուրջ` միմյանց տարածքային ամբողջականությունը ճանաչելով:

Հարցին՝ ի՞նչ վտանգ է սա ներկայացնում հայկական կողմի համար, զրուցակիցն ասաց.

«Վտանգները հետևյալն են՝ Ադրբեջանը ինչ դեմ տա, պետք է ստիպեն, որ մեր անմեղսունակը ստորագրի, որքան հասկանում եմ, ադրբեջանցիները Քյարքին էլ են ուզում, չհաշված Տավուշի համայնքները: Պատկերացնու՞մ եք, եթե Քյարքիի ավտոճանապարհը հանձնի Ադրբեջանին, բա հետո՞»,- ասել է Վահե Հակոբյանը:

Սյունիքի նախկին մարզպետի խոսքով՝ մեր երկրի անվտանգությունը և կոմունիկացիոն ճանապարհները վտանգված են:

«Մեր ճանապարհներն ընկնում են վտանգի տակ, ո՞նց եք պատկերացնում, Սյունիք ո՞նց ենք գնալու: Ադրբեջանը վեց կմ հայտարարել է իր տարածք՝ Գորիս- Կապան ճանապարհից, փակեց այդ ճանապարհը և խնդիրներ ենք ունենում՝  Պարսկաստանից անգամ բեռնատար չի կարողանալու գալ այս կողմ»,- ասել է Հակոբյանը:

--00--ԱԹ