ԵՐԵՎԱՆ, ԱՊՐԻԼԻ 9, 24News
Սաղաթելյանը Hraparak.am-ի հետ զրույցում ասաց, որ ինքն այդ կուսակցության կազմում չէ, իրենք այս պահին հրապարակման ենթակա այլ որոշում չունեն, քան այն, որը հայտարարվել էր՝ ով Նիկոլին դեմ է, իրենք նրա հետ են։ «Մենք ունենք բավարար հիմքեր՝ կասկածելու, որ այս ընտրությունները կկայանան։ Ուստի, երբ որ միանշանակ կլինի, որ այս ընտրությունները կկայանան, այդ պահին մենք կկողմնորոշվենք շատ սեղմ ժամկետում, եւ, իհարկե, դուք դրա մասին կիմանաք»,- ասաց Արա Սաղաթելյանը։
- Իսկ եթե կայանան ընտրությունները, արդյոք կմասնակցե՞ք՝ Նարեկ Սամսոնյանի գլխավորած կուսակցությամբ, եւ եթե չկայանան ընտրությունները, ի՞նչ եք անելու այդ դեպքում։
- Թե ինչ ենք անելու, եթե ընտրությունները չկայանան, անելու ենք այն, ինչ անում ենք հիմա՝ նոր թափով շարունակելու ենք պայքարը՝ ապացուցելով բոլորին, որ Նիկոլը ստախոս է եւ վարչապետի աթոռին հանգամանքների բերումով հայտնված անձնավորություն է, որն այս երկիրը տանում է դեպի անդունդ։
- Ձեր արածը մինչեւ հիմա արդյունք չի տվել։
- Թույլ տվեք Ձեզ հետ չհամաձայնել, որովհետեւ ես տեսնում եմ այդ արդյունքը՝ մարդկանց հետ շփումների արդյունքում։ Հասարակությունն աստիճանաբար դուրս է գալիս շոկային իրավիճակից, փորձում է ուշքի գալ պատերազմի ու զոհերի կորստի ցավից: Եվ հոսքը պասիվ կամ շոկային տրամադրությունից դեպի նիկոլիզմի մերժում գնալով մեծ է։
- Մենք ունենք տեղեկություն, որ Միքայել Մինասյանը որոշել է մասնակցել ընտրություններին սեփական թիմով եւ միայնակ, ցուցակը կգլխավորեք Դուք, մյուս անդամներն էլ կլինեն Ռուբեն Մխիթարյանը, Ռուբեն Մելիքյանը, Անժելա Էլիբեգովան, Կարեն Բեքարյանը եւ այլք։
- Որեւէ ցուցակ գլխավորելու հարց ինձ հետ չի քննարկվել, որեւէ ցուցակի մասին այս պահին քննարկում չկա, առավելապես Նարեկ Սամսոնյանի կուսակցությունը որպես պլատֆորմ օգտագործելու մասին մենք չենք խոսել։
- Բայց Նարեկ Սամսոնյանն ինքը մեզ ասաց, որ դեմ չի լինի, եթե Դուք գլխավորեք ցուցակը։
- Գիտե՞ք, ես կարծում եմ, որ էլի կլինեն կուսակցություններ, որոնք դեմ չեն լինի, որ ես գլխավորեմ իրենց ցուցակը։
- Իսկ ի՞նչ եք մտածում, դաշինքո՞վ կմասնակցեք, թե՞ միայնակ․ քաղաքական առումով ո՞րն է Ձեզ համար ավելի ընդունելի։
- Այս պահին ունենք բավարար հիմքեր՝ կասկածելու, որ վարչապետի աթոռին նստած կլոունը նորից առիթներ կգտնի եւ կչեղարկի ընտրությունը։ Այն պահին, երբ կնշանակվեն ընտրություններ, կարճ ողջամիտ ժամկետում, պատկերացնելով, թե ինչ է կատարվում այդ պահին դաշտում, այսինքն՝ ինչ դաշինքներ կան, ով ոնց է գնում, եւ եթե ընդունենք մասնակցելու որոշում, կծանուցենք հասարակությանը:
- Իսկ դուք պատրա՞ստ եք Ձեր նշած «կլոունի» հետ գնալ ընտրությունների, Ձեր սրտո՞վ է նրա առաջ քաշած օրակարգը՝ հունիսի 20-ին արտահերթ ընտրությունների մասով, կգնա՞ք ընտրության մի մարդու օրակարգով, որին դավաճան եք անվանում։
- Ձեր հարցի ենթատեքստը ես հասկանում եմ։ Բայց եթե չկա փրկության այլ ուղի, ես ընկալում եմ ընտրությունները որպես վերջին քաղաքակիրթ գործիք՝ սրանից ազատվելու։ Ես դեռ հավատում եմ, որ փողոցային պայքարը կարող է տալ արդյունք։ Չնայած որ բազմիցս պնդել եմ, որ Նիկոլ Փաշինյանը քաղաքական մարդ չէ, այսինքն՝ քաղաքական եւ բարոյական պատասխանատվության ինստիտուտներն իր համար գոյություն չունեն։ Ինքը բնազդներով շարժվող մարդ է, որն իրավիճակային որոշումներ է ընդունում՝ այդ աթոռին իր գտնվելը երկարացնելու համար։
- Բայց մենք տեսանք, որ Հայրենիքի փրկության շարժումն այդ փրկությունը չգտավ, փողոցով արդյունքի չհասաք, հիմա էլ գնում եք մի մարդու հետ ընտրության, որին դուք պետք է օր առաջ հեռացրած լինեիք։
- Հայրենիքի փրկության շարժման հետ ես որեւէ կապ չունեմ, մենք ընդամենը համախոհներ ենք Նիկոլին իշխանությունից հեռացման եւ երկիրը նիկոլիզմից ազատելու հարցում։ Այսինքն՝ ես չեմ կարող մեկնաբանել շարժման գործողությունները։ Երկրորդը․ ես չեմ համարում, որ արդյունքի չեն հասել։ Առաջին արդյունքն այն է, որ Նիկոլը հասկացավ, որ ընտրությունները կարող են լինել ինչ-որ իրավիճակում լարումը թուլացնելու գործիք։ Բայց նա չի գնում ազնիվ ընտրություններ անցկացնելու, նա ընդամենը փորձում է, որպես լարումը նվազեցնելու միջոց, օգտագործել ընտրությունների խոստումը։ Եվ դրա համար վերադառնում եմ այն պնդմանը, որ այս սուտասանի պարագայում բավարար հիմքեր կան ենթադրելու, որ ոչ մի ընտրություններ չեն լինելու:
- Իսկ Դուք չե՞ք տեսնում այն ռիսկը, որ Նիկոլ Փաշինյանը կարող է հունիսի 20-ին կեղծիքով, վարչական ռեսուրսի չարաշահմամբ, մարդկանց մանիպուլացնելով կամ դեռեւս ունեցած վստահության հաշվին նորից գալ իշխանության եւ լեգիտիմացնել իր գոյությունը։
- Գիտե՞ք, ես անձամբ համարում եմ, որ Նիկոլ Փաշինյանը չունի ժողովրդի վստահությունը, որովհետեւ ես շփվում եմ բազմաթիվ մարդկանց հետ, ովքեր վստահել եւ հավատացել են, հասկացնել, թե ինչ մեծ սխալ են գործել: Դրա մասին են վկայում վարչական ռեսուրսով մի կերպ կազմակերպվող նրա մարզային այցերը: Ես վստահ եմ, որ մարդկանց մեծամասնությունն արդեն հասկացել է, որ Նիկոլի հետ ապագա չկա: Նիկոլ Փաշինյանը քաղաքական դիակ է, իսկ քաղաքական դիակները երբեք չեն վերակենդանանում։ Քաղաքական դիակները մաքսիմում դառնում են քաղաքական խրտվիլակներ, ինչ-որ մեկի ձեռքում կատարում են ինչ-որ ֆունկցիա, հետո նետվում են պատմության աղբանոցը։
- Ձեր նշած այդ «քաղաքական դիակը», սակայն, մինչեւ հիմա շնչում է, նույնիսկ արտաշնչում է։
- Շնչում-արտաշնչում է, դա իր կենդանական բնույթն է․ կարող է շնչել եւ արտաշնչել։ Նա որպես երկրի ղեկավար այլեւս գոյություն չունի, կապիտուլյանտի կնիքը ցմահ դաջված է նրա ճակատին, իսկ մեր զոհված տղերքի արյունը նրա ձեռքերին է: