Ազատ ոճի ըմբշամարտի Հայաստանի երիտասարդական հավաքականն 8 մեդալ է նվաճել

ԵՐԵՎԱՆ, ՄԱՐՏԻ 9, 24News 

ըմբշամարտ

Մարտի 5-8-ը ազատ ոճի ըմբշամարտի Հայաստանի երիտասարդական հավաքականը Ուկրաինայում մասնակցել է միջազգային մրցաշարի և նվաճել ընդհանուր՝ 8 մեդալ, որից 3-ական ոսկե և բրոնզե, ինչպես նաև 2 արծաթե մեդալ:

Մրցաշարի հաղթողներ են դարձել 65 կգ քաշային Դավիթ Մարգարյանը, 74 կգ քաշային Մուշեղ Մկրտչյանը և 125 կգ քաշային Լյովա Գևորգյանը: Արծաթե մեդալներ են նվաճել Լևիկ Միքայելյանը 61 կգ և Արթուր Սարդարյանը 65 կգ: Բրոնզե մեդալներով հայրենիք են վերադարձել 57 կգ Մանվել Խնձրցյանը, 70 կգ Նարեկ Հարությունյանը և 79 կգ Կնյազ Իբոյան:

Մրցաշարին մասնակցում էր 160 ըմբիշ՝ Ուկրաինայից, Մոլդովայից, Սլովակիայից, Լիտվայից և Հայաստանից:

Ազատ ոճի ըմբշամարտի Հայաստանի երիտասարդական հավաքականի ավագ մարզիչ Ավետիք Վարդանյանը ՀԸՖ-ի մամուլի բաժնի հետ զրույցում նշեց, որ գոհ է տղաների ելույթներից:

«Ընդհանուր առմամբ` գոհ եմ: Բոլորը 4-5 գոտեմարտ անցկացրին. յուրաքանչյուր քաշային կարգում 30-35 մասնակից կար, բացառությամբ` գերծանր քաշային կարգի, որտեղ 8-ն էին: Տղաները թե՛ հաղթած, թե՛ պարտված գոտեմարտերից շատ բան ունեն սովորելու: Սա մեր հավաքականի կորիզն է: Ճիշտ է կան տղաներ, որոնք անձնագրի և երկրից դուրս գալու հետ այս պահին խնդիր ունեին, բայց Հայաստանի առաջնությունում հաղթելուց ու լավ մասնակցությունից հետո, հուսով եմ, այդ հարցն էլ կլուծվի: Այս մրցաշարը նաև լավ նախապատրաստական փուլ է ապրիլի 26-28-ը կայանալիք Հայաստանի երիտասարդական առաջնությունից առաջ»,-ասաց մասնագետը:

 --00—ՄՀ