Մեգան Մարքլը հայտարարել է, որ թագավորական ընտանիքն իրեն ստիպել է ելույթներ չունենալ

ԵՐԵՎԱՆ, ՄԱՐՏԻ 8, 24News 

Մեգան

Մեծ Բրիտանիայի արքայազն Հարիի կինը՝ Մեգան Մարքլը, պատմել է, որ թագավորական ընտանիքի ներկայացուցիչները պսակադրությունից հետո իրեն ստիպել են հրաժարվել հանրային ելույթներից։ Այս մասին գրել է ТАСС գործակալությունը։

CBS հեռուստաալիքում հարցազրույցի ժամանակ ամերիկացի հեռուստահաղորդավարուհի Օփրա Ուինֆրին հարցրել է Մարքլին՝ լռում էր որովհետև ի՞նքն է այդպես ցանկանում, թե՞ որովհետև թագավորական ընտանիքն էր ստիպում: «Վերջինը», - լրագրողի հարցին ի պատասխան ասել է Սասեքսի դքսուհին:

Նա նաև ընդգծել է, որ թագավորական ընտանիքի ներկայացուցիչները «պատրաստ են ստել»՝ իրենց ընտանիքի անդամներին պաշտպանելու համար, սակայն նրանք չեն պաշտպանել արքայազնին և նրա կնոջը:

«Ես հասկացա, որ ինձ չէին պաշտպանում. նրանք պատրաստ էին ստել ընտանիքի մյուս անդամներին պաշտպանելու համար, սակայն նրանք չէին ուզում ստել ինձ ու ամուսնուս պաշտպանելու համար», - նշել է դքսուհին։

Մարքլը հավելել է, որ իրեն ընդունել են թագավորական ընտանիքում, սակայն ընդունողները նրանք չեն, ովքեր ղեկավարում են այդ հաստատությունը (թագավորական ընտանիքը) և հավելել․ «Թագուհին միշտ հիանալի է վերաբերվել ինձ»։

Խոսելով իր առաջին հղիությանն ու իրենց առաջնեկին՝ Մեգան Մարքլն ասել է, որ թագավորական ընտանիքի որոշ անդամներ լրջորեն անհանգստացած են եղել իրենց չծնված երեխայի մաշկի գույնով:

--00—ՄՀ