ԵՐԵՎԱՆ, ՓԵՏՐՎԱՐԻ 11, 24News
Արցախի Հանրապետության նախագահ Արայիկ Հարությունյանը փետրվարի 11-ին հրավիրել է աշխատանքային ընդլայնված խորհրդակցություն՝ նվիրված ոռոգման ծրագրերի քննարկմանը: Այս մասին հայտնում են Արցախի նախագահի աշխատակազմից:
Երկրի ղեկավարը նշել է, որ հետպատերազմյան իրավիճակի հաղթահարմանն ուղղված սոցիալական ծրագրերին զուգահեռ պետք է մեծ թափով սկսել կյանքի կոչել տնտեսական մի շարք նախագծեր:
«Ճգնաժամային իրավիճակի արագ հաղթահարման համար կառավարությունը ենթակառուցվածքների վերականգնման եւ սոցիալական ծրագրերի իրականացման ուղղությամբ բավարար ջանքեր է գործադրում: Սակայն ժամանակն է նաեւ զուգահեռաբար քայլեր ձեռնարկել տնտեսության զարգացման ուղղությամբ: Այդ համատեքստում գյուղատնտեսությունը շարունակելու է գերիշխող մնալ մեր տնտեսական քաղաքականության մեջ, եւ հողատարածքների ոռոգման նպատակով առաջիկա ամիսներին կմեկնարկեն մեծածավալ ծրագրեր»,- ասել է նախագահը:
Խորհրդակցության ընթացքում Արայիկ Հարությունյանին է ներկայացվել Կարկառ գետի գլխավոր հանգույցի կառուցման նախագիծը: Ըստ նախատեսվածի՝ ծրագրի շահագործման արդյունքում Ասկերանի շրջանի վերին եւ ներքին ենթաշրջաններում ինքնահոս եւ մեխանիկական եղանակով ոռոգովի կդառնա ավելի քան երկու հազար հեկտար հողատարածք: Լսելով մասնագետների եւ ծրագրի պատասխանատուների կարծիքները՝ Հանրապետության նախագահը հավանություն է տվել նախագծին եւ հանձնարարել մեկնարկային աշխատանքները սկսել ողջամիտ ժամկետներում:
Խորհրդակցության ընթացքում քննարկվել են նաեւ Հանրապետության այլ հատվածներում նախատեսվող ոռոգման ծրագրերին առնչվող հարցեր: Մասնավորապես, ընդգծվել է Հիլիսի ջրամբարի կառուցման, Մարտունու շրջանի Բերդաշենի ենթաշրջանի եւ Մարտակերտի շրջանի ցածրադիր հողատարածքների ոռոգման ծրագրերի աշխատանքները սեղմ ժամկետներում սկսելու կարեւորությունը:
--00--ԱԹ