Քարտային հաշիվներին փոխանցված աշխատավարձերից վարկերի մարման գանձումներ չեն կատարվել

ԵՐԵՎԱՆ,  ՆՈՅԵՄԲԵՐԻ 4, 24News

․

«Արցախբանկ» ՓԲԸ հաճախորդների քարտային հաշիվներին փոխանցված 2020 թվականի հոկտեմբեր ամսվա աշխատավարձերից վարկային պարտավորությունների մարման գծով գանձումներ չեն կատարվել:

Այս մասին «Արցախպրես» լրատվական գործակալության՝ «Արցախբանկ» ՓԲԸ–ի վերաբերյալ սոցիալական ցանցերում տեղ գտած գրառումների եւ քննարկումների արդյունքում արված հարցմանն ի պատասխան հայտնել են ընկերությունից:

Ընկերությունը տեղեկացրել է, որ եզակի անձինք գանձումների խնդրով դիմել են բանկին, վերջիններիս  հարցերը տեղում պարզաբանվել են եւ, անհրաժեշտության դեպքում, կատարվել  ճշգրտումներ: Եթե իրականում հաճախորդների մոտ առկա են հարցեր, կարող են դիմել բանկին:

«Կցանկանայինք հավաստիացնել մեր  հաճախորդներին, որ «Արցախբանկ» ՓԲԸ-ն անում է ամեն հնարավորը իր հաճախորդների անխափան սպասարկումը իրականացնելու գործում: Հորդորում ենք բոլորին զերծ մնալ ապատեղեկատվություն տարածելուց եւ ստեղծված լարված պատերազմական իրավիճակում խառնաշփոթ չստեղծել»,- տեղեկացրել են ընկերությունից:

--00--ԱՀ