ԵՐԵՎԱՆ, ՀՈՒՆԻՍԻ 9, 24News
«Ռոսպոտրեբնադզորի» կայքում հաղորդվում է, որ ԵԱՏՄ անդամ երկրերի բնակչության սանիտարահամաճարակային բարեկեցության ոլորտում լիազորված մարմինների ղեկավարների խորհուրդը համաձայնեցրել է Միության երկրներում կորոնավիրուսի տարածումը կանխելու հարցով ծրագիրը: Հաղորդում է РиаНовости-ն:
«Ռոսպոտրեբնադզորի» ղեկավար Աննա Պոպովայի նախագահությամբ տեսակոնֆերանսի ռեժիմով այս տարի կայացել է արդեն 10-րդ նիստը: Նիստին մասնակցել են Հայաստանի, Բելառուսի, Ղազախստանի և Ղրղզստանի ներկայացուցիչները:
«Ղեկավարների խորհրդի հանդիպման ընթացքում համաձայնեցվել է Եվրասիական տնտեսական միության անդամ պետությունների տարածքներում կորոնավիրուսային հիվանդության և այլ վարակիչ հիվանդությունների տարածումը կանխելու միջոցառումների համալիր ծրագրի նախագիծը»,- ասված է հաղորդագրության մեջ:
Համալիր ծրագիրն ուղղված է ինչպես ԵԱՏՄ երկրներում կորոնավիրուսային հիվանդությամբ պայմանավորված ընթացիկ համաճարակաբանական իրավիճակի բարելավմանը, այնպես էլ համաճարակային պոտենցիալով այլ վարակիչ հիվանդությունների կանխարգելմանն ու արձագանքմանը:
Նշվում է, որ հաջորդ նիստերում նախատեսվում է քննարկել նաև սահմանված սահմանափակումների մեղմացումը և բնակչության ազատ տեղաշարժի վերսկսումը:
--0-- ՍՊ