ԵՐԵՎԱՆ, ՀՈՒՆԻՍԻ 11, 24News

Հունաստանի արտաքին գործերի նախարարության միջազգային տնտեսական հարաբերությունների հարցերով պատասխանատու գլխավոր քարտուղար Դիմիտրիս Սկալկոսը Երևանի ու Աթենքի միջև առկա քաղաքական հարաբերությունները գնահատում է գերազանց, սակայն նկատում է, որ երկկողմ տնտեսական հարաբերությունները շատ սահմանափակ են, իսկ առևտրի ծավալը՝ գրեթե զրոյական։ Նրա խոսքով՝ երկու երկրներն այժմ սկսել են մտածել, թե ինչպես կարելի է փոխել այդ իրավիճակը՝ հաշվի առնելով, որ երկկողմ տնտեսական մեծ ներուժ կա։

Հունաստանի ԱԳ նախարարության պաշտոնյան այս մասին նշել է «Երևանյան երկխոսություն» միջազգային համաժողովի շրջանակներում «Արմենպրես»-ին տված հարցազրույցում։

«Երևանն ու Աթենքն արդեն երկար տարիներ գերազանց քաղաքական հարաբերություններ ունեն։  Քաղաքական հարաբերություններ, որոնք կառուցված են ամուր մշակութային և պատմական կապերի վրա։ Վստահ եմ, որ տեղյակ եք՝ Հունաստանում ունենք կենսունակ հայկական համայնք։ Ես այնտեղ շատ ընկերներ ունեմ, և ես իսկապես ուրախ եմ դրա համար։ Սակայն, երբ մենք քննարկում ենք տնտեսական հարցերը, տեսնում ենք, որ մեր երկկողմ տնտեսական հարաբերությունները շատ սահմանափակ են։ Իրականում, երկկողմ առևտրի ծավալը գրեթե զրոյական է, ինչը տնտեսական տեսանկյունից բացարձակապես անընդունելի է։ Եվ մենք սկսել ենք մտածել, թե ինչպես կարող ենք փոխել այդ իրավիճակը։ Իրականում որոշ ժամանակ առաջ ես հնարավորություն ունեցա քննարկելու այս հարցերը Աթենքում Հայաստանի դեսպանի հետ։ Եվ մենք պլանավորում ենք, հավանաբար, այս աշնանը մեր երկրների միջև համատեղ նախարարական կոմիտե ունենալ՝ համագործակցության կոնկրետ ոլորտները որոշելու համար։ Կարծում եմ, որ չնայած համաշխարհային առևտրի այս բոլոր անկայունություններին՝ հատկապես մեր երկու երկրների միջև երկկողմ տնտեսական իրավիճակը շատ խոստումնալից է»։

Մանրամասն՝ սկզբնաղբյուր կայքում։

–00—ՅՄ