ԵՐԵՎԱՆ, ՕԳՈՍՏՈՍԻ 12, 24News

«Արարատի» ավագ և Հայաստանի հավաքականի նախկին կիսապաշտպան Գոռ Մալաքյանը որոշել է ավարտել իր ֆուտբոլային կարիերան։ Այս մասին տեղեկացնում է «Արարատի» մամուլի ծառայությունը։ 31-ամյա խաղացողը Երևանի ակումբում էր հանդես գալիս 2021 թվականից, իսկ մինչ այդ խաղացել է «Փյունիկում», «Ալաշկերտում», «Շիրակում», ուկրաինական «Ստալում» և «Արարատ-Արմենիայում»։ Մալաքյանը նաև 18 հանդիպում է անցկացրել Հայաստանի ազգային հավաքականի կազմում։

«Սիրելի ֆուտբոլասերներ, ցանկանում եմ տեղեկացնել, որ որոշում եմ կայացրել ավարտել ֆուտբոլային կարիերաս, քանի որ նոր փուլ է սկսում իմ կյանքում՝ մարզչական գործունեության մեջ։ Կարծում եմ, որ իմ որոշումը ճիշտ էր, քանի որ գիտակցաբար եմ եկել այս քայլին։ Մաքուր և հանգիստ խղճով եմ հեռանում, որպես ֆուտբոլիստ, բայց վստահ եմ, որ մեծ հաղթանակները դեռ առջևում են», — նշել է Մալաքյանը։

«Արարատի» գործադիր տնօրեն Տիգրան Ղարաբաղցյանը ընդգծել է, որ Մալաքյանի որոշումը ակումբի համար անսպասելի էր, սակայն նրանք հարգանքով են վերաբերվում այդ ընտրությանը։ «Գոռը մեր թիմում անցկացրել է չորս լիարժեք մրցաշրջան՝ դրսևորելով բարձր պրոֆեսիոնալիզմ և անսասան նվիրվածություն, արժանի կերպով կրելով ավագի թևկապը», – ասել է նա։

«Արարատը» շնորհակալություն է հայտնել Մալաքյանին ակումբին նվիրվածության համար և մաղթել հաջողություն մարզչական կարիերայում։

–00—ՍՊ