ԵՐԵՎԱՆ, ՀՈՒՆԻՍԻ 18, 24News

ՀՀ դեսպան Աշոտ Սմբատյանի՝ Հունգարիայում դիվանագիտական առաքելության ավարտի կապակցությամբ հունիսի 17-ին Բուդապեշտում տեղի ունեցավ պաշտոնական ընդունելություն։ Ընդունելությանը ներկա էին Հունգարիայի ԱԳ և առևտրի նախարարության բարձրաստիճան պաշտոնյաներ, Հունգարիայի Ազգային ժողովի պատգամավորներ, կառավարության և այլ նախարարությունների ներկայացուցիչներ։ Միջոցառմանը ներկա էին նաև Հունգարիայի Հայ ինքնավարության ղեկավարությունը, դիվանագիտական անձնակազմի ղեկավարներ և անդամներ, հայ համայնքի և համալսարանական շրջանակների ներկայացուցիչներ։

ՀՀ դեսպանն իր հրաժեշտի խոսքում շնորհակալություն հայտնեց բոլոր ներկաներին, մասնավորապես ԱԳ և առևտրի նախարարության ներկայացուցիչներին՝ սերտ համագործակցության և աջակցության համար, ինչպես նաև Հայ ինքնավարության ներկայացուցիչներին՝ Նիկողոս Հակոբյանին, Ցարան Իշտվանին և այլոց, նշելով, որ պաշտոնավարման ընթացքում միշտ զգացել է նրանց գործուն աջակցությունը, առանց որի հնարավոր չէր լինի հասնել զգալի արդյունքների։

Նույն օրը Հունգարիայի Հայ ինքնավարության նախագահությունը ՀՀ դեսպանին պարգևատրեց Հունգարիայի Հայ ինքնավարության և Հունգարիայի կառավարության համատեղ տարեկան «Արարատ հանուն հայության» բարձր մրցանակով՝ Հայ համայնքի համար կատարած բացառիկ գործունեության համար։

–00—ՍՊ