ԵՐԵՎԱՆ, ՀՈՒՆԻՍԻ 6, 24News

Վրաստանի անկախության տոնի առթիվ ՀՀ-ում այդ երկրի դեսպանատանը կազմակերպված ընդունելության ժամանակ հանդիսավոր պայմաններում ազդարարվեց նաև Հայաստանում վրացական մշակույթի օրերի մեկնարկը։

«Արմենպրես»-ի հաղորդմամբ՝ ՀՀ-ում Վրաստանի արտակարգ և լիազոր դեսպան Գիորգի Շարվաշիձեն իր ելույթում նշեց, որ վրացիների և հայերի միջև բարիդրացիության, բարեկամության և համագործակցության դարավոր ավանդույթն աննախադեպ օրինակ է համաշխարհային պատմության մեջ։ Դեսպանի խոսքով՝ ականավոր հայ հասարակական գործիչներ՝ Նաղաշ Հովնաթանը, Սայաթ Նովան, Շամչի Մելկոն, Խաչատուր Աբովյանը, Ավետիք Իսահակյանը և, իհարկե, Հովհաննես Թումանյանն առանձնահատուկ սեր են տածել Վրաստանի նկատմամբ, ինչպես նաև Հայաստանը՝ վրացական գրականության շատ դասականների նկատմամբ։

Նա հատկապես նշեց, որ Վրաստանի և Հայաստանի ֆուտբոլի ֆեդերացիաները համատեղ հայտ են ներկայացրել 2029 թվականի մինչև 20 տարեկանների աշխարհի առաջնությունը հյուրընկալելու համար և հույս հայտնեց, որ ՖԻՖԱ-ն կբավարարի այդ հայտը։

«Վրաստանի և Հայաստանի քաղաքացիներն այժմ կարող են սահմանը հատել առանց անձնագրի, միայն նույնականացման քարտերով, ինչը ավելի է ամրապնդում և խորացնում վրացիների և հայերի միջև համագործակցությունն ու բարեկամությունը։ Այս տարի Երևանում հունիսի 5-ից 7-ն անցկացվում են Մշակույթի օրեր, ինչը նշանակում է, որ հաջորդ տարի Հայաստանի մշակույթի օրերը կանցկացվեն Վրաստանում։ Հուսով ենք, որ բոլորը կվայելեն վրացական գինին, խոհանոցը և ազգային պարերն այստեղ՝ Երևանում, քաղաքի սրտում։ Ազգային զբոսաշրջության վարչության տվյալներով՝ 2024 թվականին Վրաստան է այցելել 948,299 ՀՀ քաղաքացի, ինչը կազմում է ժամանողների ընդհանուր թվի 12.7%-ը: 2024 թվականին Վրաստանի և Հայաստանի միջև առևտրաշրջանառությունը գերազանցել է 854 միլիոն դոլարը»,- ասաց Շարվաշիձեն։

Մանրամասն՝ սկզբնաղբյուր կայքում։

–00—ՅՄ