ԵՐԵՎԱՆ, ՄԱՅԻՍԻ 16, 24News

Թուրքիայի նախագահ Ռեջեփ Թայիփ Էրդողանը կմեկնի Ալբանիա՝ մասնակցելու «Եվրոպայի քաղաքական համայնքի գագաթնաժողովին»: Այս մասին հայտնում է Էրմենիհաբերը:

Գագաթնաժողովի շրջանակներում նախատեսվում են մի շարք երկկողմ հանդիպումներ:

Ակնկալվում է, որ Էրդողանը շփումների օրակարգում է պահելու Ստամբուլի ռուս-ուկրաինական բանակցությունները, ինչպես նաև տարածաշրջանային և համաշխարհային նշանակության հարցերը:

Հավելվում է նաև, որ Թուրքիայի նախագահը հանդիպումներում անդրադառնալու է Պաղեստինի Գազայի հատվածում տիրող իրավիճակին և Իսրայելի կողմից իրականացվող գործողություններին:

Նշենք, որ գագաթնաժողովին մասնակցելու է 48 երկրի առաջնորդ, ինչպես նաև Եվրախորհրդի, Եվրախորհրդարանի և Եվրոպական հանձնաժողովի ղեկավարները:

Գագաթնաժողովի քննարկման հիմնական թեման ամոփված է «Նոր աշխարհ, նոր Եվրոպա. Միասնություն-համագործակցություն-գործընկերություն և գործողություն» խորագրում:

Անդրադարձ է կատարվելու Եվրոպա մայրցամաքին վերաբերող խնդիրներին: Այս համատեքստում կազմակերպվելու է 3 առանձին կլոր սեղան-քննարկում:

Ակնկալվում է, որ կողմերը գնահատականներ են տալու Եվրոպայի անվտանգության, ժողովրդավարության պաշտպանության, մրցակցային ուժի և տարբեր սպառնալիքների դեմ պատրաստվածության ու միջամտության կարողանակության հետ կապված հարցերի վերաբերյալ:

–00–ԱՀ