ԵՐԵՎԱՆ, ԱՊՐԻԼԻ 18, 24News

Ապրիլի 8-ին գողության դեպք է տեղի ունեցել Երևանում։ Ժամը 12։10-ի սահմաններում ՀՀ ներքին գործերի նախարարության ոստիկանության համայնքային ոստիկանության գլխավոր վարչության Կենտրոնական բաժնում տեղեկություն է ստացվել, որ Հանրապետության փողոցի 76/1 հասցեի բակում կայանված ավտոմեքենաներից գողացել են կողային հայելիների ապակիներ։

Ինչպես հայտնում է ֆոտոլրագրող Գագիկ Շամշյանը, օպերատիվորեն մեկնած ոստիկանության Կենտրոնական բաժնի ծառայողները պարզել են, որ ապրիլի 7-ի՝ ժամը 20։00-ից մինչև ապրիլի 8-ի ժամը 09։00-ն ընկած ժամանակահատվածում նշված հասցեում կայանված «Hyundai» և թվով 4 «Lexus» մակնիշի ավտոմեքենաների կողային հայլիների ապակիները բացակայում են:

Ոստիկանների կողմից ձեռնարկված միջոցառումների շնորհիվ պարզվել է, որ նշված արարքը կատարել են Տավուշի մարզի բնակիչներ 30-ամյա Ատոմ Հաթամյանը և 37-ամյա Կարեն Գրիգորյանը, որոնց հայտնաբերելու ուղղությամբ ոստիկանության Կենտրոնական բաժնի ծառայողների կողմից ձեռնարկվում են միջոցառումներ։

Դեպքի փաստով ոստիկանության Կենտրոնական բաժնում փաստաթղթեր են կազմվել, որոնք փոխանցվել են ՀՀ քննչական կոմիտեի Երևան քաղաքի քննչական վարչության Կենտրոն և Նորք Մարաշ վարչական շրջանների քննչական բաժին։

–00—ՅՄ