ԵՐԵՎԱՆ, ՄԱՅԻՍԻ 16, 24News
«Ժողովրդավարական համախմբում» կուսակցության նախագահ, «Տավուշը հանուն հայրենիքի» շարժման առաջնորդներից Սուրեն Պետրոսյանը հայտարարություն է տարածել․
«ՀՀ իշխանությունների գործելաոճը նման է սեփական ժողովրդի նկատմամբ պետական ահաբեկչության:
Կիրացում տեղի ունեցողը մարդու իրավունքների կոպիտ ոտնահարում է: Որևէ իշխանություն իրավունք չունի նման կերպ նսեմացնելու իր քաղաքացու արժանապատվությունը, ահաբեկելու և պատերազմի սպառնալիքի ներքո, ուղիղ իմաստով խլելու սեփականության իրավունքով մարդուն պատկանող հողը, տունը:
Ակնհայտ է, որ Բաքվի պարտադրանքով կատարված սահմանազատումը չի բխում Հայաստանի շահերից։ Ավելին, ըստ մամուլի տեղեկությունների, Ադրբեջանի վերահսկողության տակ է անցնում միջպետական ճանապարհի մի հատվածը և գազատարը, ինչը ռազմավարական նշանակություն ունի ՀՀ-ի համար։
Այս իշխանությունը պարտավոր է հաշվի նստել կառավարության և վարչապետի անհապաղ հրաժարականի՝ հանրային պահանջի հետ:
Ժողովրդի և շարժման առաջնորդների հետ երկխոսություն սկսելուն այլընտրանք չկա:
Այս իշխանության միակ ողջամիտ քայլը հանրային պահանջն ընդունելն ու խաղաղ հեռանալն է: Սա է պետության ու պետականության կործանումը կանխելու միակ ճանապարհը»։
--00—ՍՊ